感恩

親愛的各位：

其實我都希望可同大家分享一下，呢兩個幾月黎嘅經歷．由於禮拜四練歌時間有限，所以我都係選擇在詩班網頁內分享．　　當初知道有了BB時，好開心，好感恩，甚至唔敢相信呢個係事實．自此之後，我就有好大嘅變化．每朝早一醒就勁作嘔，其至冇野嘔都照嘔．就算行路，等車，搭緊車，都會作嘔，有時又怕被人見到，都好尷尬．作嘔嘅感覺係唔會停架，頭一個月，我最慘，成日作嘔，食又食唔到，肚餓但食唔落，食少少已經好飽，再食就會嘔，飲水都唔可以飲多過兩啖，又想嘔．係屋企無端端都會嘔，一星期有三四日會嘔，每次嘔都會視付嘔幾多次．這段日子，我過得好辛苦，我每日靈修祈禱，求神醫治我，幫助我．因我當時嘅心情好差，情緒好低落，做乜都冇心機，就連講野都唔想講．睡覺都唔係咁容易，每晚個心口悶住或作嘔住咁嘗試去睡，至少成個鐘才可以入睡．每日循環，你話心情會有幾好？　　四月尾時，因BB嘅情況唔穩定，加上成日嘔，又遇著要做崇拜主席，這時自己嘅情況真的麻麻地，同時開始有些擔心．我祈禱，祈求神賜我精神力量，去完成我的事奉．非常感恩，神真的幫助我，祂使我有力量去做．但跟住嘅聖餐獻詩，我就參與唔到了，因我真的需要休息．　　五月，可能開始適應，我嘅情況雖冇乜改善，但感覺好似好D．而最尾的那個星期，我開始冇朝早作嘔啦！YeahYeahYeah！多謝上帝！不過任何時間嘅嘔都係會繼續架！最攪笑係，我同時間染上傷風，個頭同個鼻好痛，個鼻塞哂！好慘！跟住嘅六月聖餐，我又再一次獻唔到詩啦！好失落！　　我好希望下次可以順順利利咁獻詩，至少獻到百週年感恩崇拜呀！　　在這段時間，真的好多謝各位弟兄姊妹嘅關心同代禱，尤其係有經驗嘅姊妹，佢地俾左好多好寶貴嘅意見，多謝哂！

願神祝福各位．